كتاب " عروسة 101 " ، تأليف : اماني اسماعيل علي، نقرأ من الكتاب :
أكيد خطر علي بالك السؤال ده .. أنا مبسوطة في حياتي، بلاقي حد يعملي كل طلباتي، بخرج مع أصحابي، حياتي مليانة سواء طالبة أو بشتغل. طيب ليه أتجوز و أتحمل مسئولية بيت و أولاد و أضطر أنظف و أطبخ و أتحمل راجل غريب عني، مش عارفة ممكن أكون سعيدة معاه ولا تعيسة ؟
نقولك ليه تتجوزي؟ علشان تلاقي حد يشاركك أفراحك و يخفف عنك أحزانك، علشان تعيشي معاه إحساس عمرك ما هتحسيه مع أصحابك، علشان تكوني ملكة و حرة في بيتك , تتجوزي علشان سنة الحياة إنك تكوني أم و تخرجي للدنيا ذرية صالحة.
لكن قبل ما تلاقي نصفك التاني لازم تعيشي حياتك. بمعني تاني إوعي تعملي لحياتك "بوز" في إنتظار فارس الأحلام:إدرسي و نمي نفسك و إتمتعي بحياتك في حدود الدين و الأخلاق و أكيد في الوقت المناسب ربنا هيبعتلك نصيبك اللي هيكون خير إن شاء الله , إحذري من أحلام اليقظة و التفكير في كل شاب يدخل حياتك علي إنه عريس لأن ده هيسبب ليكي مشاكل و ألم إنتي في غني عنه, إتعاملي مع الجميع بلطف و ذوق و الشخص المناسب ليكي أكيد هيبدأ يقرب منك و يحاول التعرف عليكي , و برضوا مش هتجري عليه بدون تفكير لازم تتأكدي أنه مناسب ليكي و هو ده الشخص اللي تحبي تكملي معاه حياتك, يفضل كمان تكون خطوات الزواج مش سريعة علشان كل خطوة ممكن تكشف طباع مخفية فيه وعلشان لما تدخلي عش الزوجية لازم تكوني واثقة مليون في المية أنه فعلا هو ده فارس أحلامك.
مشاركات المستخدمين