الباب الأول

أم أحمد المصرية ورئيس الجمهورية

أم أحمد المصرية ورئيس الجمهورية
(1) حادث أثيوبيا 1997

وأنا واقفه بعيد ف المطبخ
.. وعيالى هناك فاتحينه
بيشوفوا الفيلم العربى
.. مع إنه قديم حافضينه
عمّاله أطبخ وأغنى (ريداك والنبى ريداك)
وقصادى الجاره بتحكى ويّايا من الشباك
( با احكى لها عن «الرزاز» وضرايبه على المبيعات )
( وازاى بقى؟ «عاطف صدقى» طنّش وضاربها سُكات)
والريس مش حايسيبهم لازم يبعت يحاسبهم
« حا ابعت له الصبح جواب وحا اقوله أوام أدبهم »
ف الشعب انطلقوا يا ريس ولا حّدش فينا عاجبهم ؟!
« حايرد علىّ يقول لى أنا حا الغى أوام مناصبهم »
● ● ●
واتقطع الفيلم العربى
ولقيت أحمد قُدامى
واقف يُصرخ م الخضّـــة !
واتقطع أنا برضو كلامى !!
● ● ●
بيقول لى «الريس» يا امّه ضربوه بالنار ف أثيوبيا
ولطمت يا ناس على وشى واندلقت منّى اللوبيا !!
يا نهار اسود ومنيل !!
مين قال لك كده يا منيل ؟؟
ماتكونش يا واد بتألِّف
وكلامك ده كلام عيِّل ؟؟
ولقيت جارتى بتصوّت وتقول معقول يا مُبارك ؟؟
دا انت بتدينا القوه وجمالنا بعْدكْ بَارك
واتزلزل بينا البيت من غير زلزال زلزلنا !!
وجرينا أوام ع الشارع ع السلم دوغرى نزلنا
والبيت فتّح فى بيانه مابقاش واحد فى الشقه
نازلين نجرى ونعيّط والكل بيصـــــــرُخ لأه
« ولقينا عم محمد جارنا العيان الطيب »
ماسك راديو ترانزستور حاطّه من ودُنه قريب
قام جرجس قاله بحُرقه : طمنّا يا عم محمد
وقعدنا نبُص ف وشه وقلوبنا راح تتجمّد
راح ماسح دمعة عينه .. قال لنا مبروك يا جماعه
الريس ربّنا حارسه وحكاية ضربه إشاعه !!!
● ● ●
ولقيت جارتى قُدامى .. سبقانى هناك ع السلم
هىّ من الفرحه تزرغت .. وأنا من فرحتى با اتكلم
قلت لها أُمَّال ياحبيبتى دا الريس غالى علينا
هوّه اللى ف إيده الدفّه لو سابها حاتغرق بينا
والمصرى حايفضل مصرى
يعشق ويحب أخوه
وان حد غريب قرّب له
ينعل داغ اللى جابوه
أمّال .. أمّال .. يا حبيبتى يا أُختى !!