أم أحمد المصرية ورئيس الجمهورية
(2) عنوان الريس إيه ؟!

وانا واقفه بعيد فى المطبخ محتاره راح اطبخ إيه !!..
اللحمة خلاص نسيناها !! والعدس بعشره جنيه !!..
با اقلى بدنجان واتحسّر ما انا بيهِ دايمـاً موعوده !!..
بتلاته جنيه الكيلو !! والزيت طالع فى الموضه
\
بقى يا أختى بعشره جنيه !! ويقولو الطبخه السودا !!
من كُتر ما كَلته يا أُختى خلاَّ حياتى بدنجان !!
أنا والراجل وعيالى إتصابنا خلاص بجنان !!
من غيظى قعدت أغنى .. يا معذب قلبى معاك
وقُصادى الجاره بتحكى ويّايا من الشباك
قلت لها دى حاجه تجنن اللحمه دى غليت نار
(مصروف الشهر يا أُختى مش ماشى مع الأسعار) !!
والواد المايل إبنى جايب فى شهادته ملاحق
والراجل آهه حايسبنى مش قادر يا اختى يلاحق
الصُبح يروح الشركه والضُهر كمان سواق
وآما بيرجع يخانقنى قال يعنى أنا ناقصه خِناق !!
وينام وشه فى الحيطه حتى وانا ( حاطّه زواق ) !!
ودا كله وقال يا حبيبتى « الريس » ساكت يا اختى !!
● ● ●
والراجل قال من (قهره) عمّـال يشرب فى (سجاير)
ويلف الشقه يا أُختى بسيجارته دايرٍ داير
يقعد على حرف سريرنا و (يكُح) يصحى النايم
وأقول له يقوم يتهوّى يحلف أبداً مش قايم !!
مش قادر ( يُلقط نَفَسُه ) ويقول لى (يا صدرى يا قلبى) ؟!
من كتر سجايره يا أختى حولنى ( مُدخل
من كُتر سجايره يا أُختى حوّلنى ( مُدخن سلبى ) !!
أصبحت با اكُح معاه والرئه صبحت تعبانه
والواد جات له ( الحساسيه ) والبنت كمان ( عيَّانه ) !!
والدوا ولّع (بالجات) مش قادره أجيب أدويّه
ولا قادره أروح لدكاتره ولا قادره على التغذيّه
كوباية اللبن اتمنعت والبيضه بنُص جنيه
وحياتك عندى حا اروح له .. عنوان (الريس) إيه ؟!!