دا انا يا اختى با اقول للراجل دى (سجايرك حا تموتنا)
(معقول تشترى بفلوسك سم بيقتل صحتنا) ؟؟
ويقول لى انا ( با انفخ فيها وبا اطلّع غُلبى وهمّى)
(والله لو اتكلمتى لا اطفش وأروح عند امى) !!!
(يطفش ويروح عند أمه؟!!) وانا حا ارضى بذلى وعيشتى ؟!
ودا كله بيحصل فىّ و (الريس) ساكت يا اختى !!!
راح أخلى حماده (اسم الله) يكتب له جواب ف الحال
ويقول له (يا ريس) غتنا وادينا شوية مال
وكمـان تدينا علاوه وتخفض ف الأسعار
وتخلى حياتنا حلاوة ( لاحسن بيتنا حا ينهار )
وساعتها ( الراجل يهدى ويبطَّل شرب سجاير )
ده ( الراجل يا اختى بينفخ !! مش شايف أى بشاير ) !!
وحياتك عندى يا أُختى مش حا اسكت ع الحال دوّه !!
لازم حابعت « للريس »
لازم حا ابعت « للريس » هوّه اللى ف إيده القوَّه ..
ودى عاوزه كلام يا حبيبتى دا « الريس » منّا وفينا
( ماسك ف إيديه الدفَّة لو سابها حاتغرق بينا )
( لو أى وزير ينسانا منُّه الريس يحمينا )
لكن لو « هوّه » نسانا حا يخلوا عالينا واطينا !!
آمال يا حبيبتى يا أُختى دا « الريس أبن الشعب »
لازم يسمع شكوتنا ( ويحس ان احنا ف غُلب )
( احنا الشعب اللى اختاره والناس كلها حبُّوه )
( أول ما بتخلص مُدَّة ... بنبايعه وننتخبوه )
ح نقول له ( إلحق يا زعيمنا حقّنا منَّا بياخدوه )
( الواد خلَّص تعليمه وخدوه ع القهوه راموه)!!
و ( البنت اهى بارت جنبى وأبوها خلاص جنّوه ) !!
و ( إن كان على عقلى يا ريس أنا عقلى كمـان لحسوه ) !!
أول - ما حايقرا جوابى حايرد بسرعه علىّ )
ويقول لى ( خلاص يا أم احمد طلباتك جوّه عينىّ )
دا « الريس » طيِّب يا اختى حايطمّن بالى وحيرتى
وحياتك عندى حايحصل دا أنا عارفه « مبارك » يا اختى
* * *