الباكورة
رسم الشاعر الأديب أسعد زيدان من البرازيل صورة مشرقة عبَّر فيها أصدق التعبير عن فن الزجل والشعر المحكي ، حيث قال :
الزجل أو كما نسميه مفاخرة الشعر الشعبي هو صوت في حنجرة كل شاب ، وهو موال غرام على شفة كل مراهق ، وغمزة عين صائبة السهام في عيون الفتيات العذارى الحالمات .
الزجل موسيقى صارخة مع مجوز الرعيان في وديان وتلال بلادنا ، وصوت أبوالزلف حنون تعيد صداه صخرة الشير ، وخضرة الحقول والبساتين ، وترنيمات عتابا وميجانا ترقص على كلماتها ونغماتها أغصان الصنوبر والحور والسنديان ، وقلوب الفلاحين والسائحين والمصطافين .
الزجل هو دبكة الفرح في حفلات الزواج ، وزغردات الغبطة والحبور في لقاء الغياب والأحباب .
أما الشاعر اللبناني إيليا أبو شديد فقد أضاء جوانب عديدة من الشعر العامي حين قال :
الشعر العامي أو الزجل لو أنصفوه لسموه الشعر لا أكثر ولا أقل ، هو لون من ألوان الأدب لا أبهى ولا أبدع ، إنه أقرب أنواع الأدب إلى الحياة لأنه أرهف شعورا ًبها ، وأشدُّ
التصاقا ً بأعماقها ، وألطف تعبيرا ً عن مشاعرها العفوية ، وأرق انطلاقا ً من السجية البكر والسليقة الموهوبة .
إنه يتفجر من صميم الحياة تفجر الينبوع الصافي من قلب الجبل ، ويجري في الجرود والوهاد ، في السفوح والسهول ، في المروج والرياض ، في البساتين والحدائق ، في خلايا النبات ونخاريب الصخور كما تجري الدماء في الأجسام .
هو لا ريب الشعر الصافي الصادق البعيد عن التكلف ، الغريب عن الحذلقة ، العاري من التصنع والتقليد ، إنه كالحقيقة ، ويا لعبقرية من قال :
الحقيقة عذراء حسناء عارية تخرج بعريها القدسي الجمال ، الفريد الروعة والبهاء من بئر عميقة الغور سحيقة القرار .
وقد عبر ابن الأثير عن قاعدة كبرى قديمة جديدة دائما ً إذ قال : الألفاظ داخلة في حيز الأصوات ، لأنها مركبة من مخارج الحروف فما استلذه السمع منها فهو الحسن ، وما كرهه ونبا عنه هو القبيح .
وإنني لأرجو أن يستلذ السمع بهذه القصائد البكر ، وتتفاعل مع النفس الإنسانية بشفافية لتحقق غاية الإبداع في التناغم مع الذوق والإحساس والتوحد بجوهر الحق ، ونشوة الفرح وعبقرية السحر ونضارة الجمال .
الصافي في محردة
لما قالوا لي لافي جن الشعر ال ع شفافي
حروف العطر خيوط الشعر
غزلتلك أحلى قوافي
وجهك أحلى من الربيع وصوتك صوت الينابيع
وين في متلك يا وديع بهالدني كلا مافي
محردة بدها تغني تجود ويسكر ع أمو العنقود
بدنا العود يجن العود ويفيق القمر الغافي
محردة وكل شي فيها نجوم
وفيها دوالي وفيها كروم
قالت لو القيامة تقوم ما بتعشق غير الصافي
ما بتعشق غير الصافي .
** بعد الهوى **
اصفرو ورقات الشجر يا مفارقة وبلشوا ع الأرض يتكو ويوقعو
إنت ِ عملت ِ معجزة شو خارقة هجرت ِ فؤادي وتركتيه بمصرعو
عريو أغصان الشجر هالغابقة يلي كانو من الورق عم يركعو
ودبلت الوردات اللي كانت عابقة والزهر لأ ما عاد عطرو ينفعو
وطيور كانت من هوانا ناطقة هلقا صعب كتير ريقا تبلعو
نسيت ِ الوقفة جناح قلبي حارقة قناديل كل الليل كانو يلمعو
الأجراص يلي دوم كنا نرافقا راح الهوى وما عاد صوتا نسمعو
الدقات لأ مش متل أول خافقة وناقوسنا ما عاد في من يقرعو
حرام ميت حرام أه يا عاشقة زرعنا وسقينا دغري هيك منقلعو
هالغصن يلي عطر زهرو ناشقة حب وتفاني كتير حاملك معو
عودي تا نرجع كل ذكرى سابقة في زهر أبيض منتظر تا نزرعو .
**بتجنني**
ما بتذكري من كم سنه
هديتك يا حلوة سوسنه
ذكرى المحبة يا منى عمري
بهالعمر الهني
وأنت هديتيني البسمة بوقتها
وكلمة بحبك من شفايف ناطرة تاتنجني
بتسوى الدني
وحياة عينيك الدني,
كل الدني
مابتذكري من كم سنه
كنا يا عمري زغار وكبرنا
وصرنا نحنّ بشوق ع هالولدنه
كبرنا سوى
وبعدك عيوني بتفتني
وبعدك بذوقك بالحلا
بتجنني بتجنني
بتجنني
**حبك أنا **
حبك أنا بالقلب ربيتو تازهَّر بغصن الهوى وأورق
ولون السما والبحر حبيتو كرمال لون عيونك الأزرق
يا ريت لو بقدر أنا ياريت سافر بموج عيونك وأغرق
يا ريت كنت بقلبها مريت وسرارها بلحظة عمر أسرق
وقلها للحب عندي نجوم إلا بليالي الحب ما بتبرق
وبالبحر عندي إن كان بدنا نعوم عيون وقلب صارو بشكل زورق
حلوة وما بنسى يوم نتلاقى ونحكي بعيون الحب ع المفرق
ولمن كنت أقطف لها باقة كل الصبايا عليها تتحروق
ع شعرها ياما غفو النسمات والخمر ياما بتمها تعَّتق
ولما شفافا فتقَّو البسمات بتشرين صار الورد يتفتَّق
سألت الورد والزهر ردولي لولا شفافا العطر ما بيعبق
سألت الزنابق هيك قالولي أنت ِ الحبق والفل والزنبق .
** بدور**
كانت بدور
حلوة زغيرة متل الفراشة
تتنقل بهالقلب
ع زهور أحلى زهور
وترفّ بجناحاتها وتدور
كانت ترشّ الندي ع الزنبق الغيران
وتبوس أحلى قرنفلة تيغار هالمنتور
وعالكرم لما تروح تنقز معا هالروح
تقطف من العنبات حبَّات من بلور
وتغزل سحر كلمات خيوط للنجمات
وتسابق النسمات تا تفيِّق الناطور
كانت إذا ما الشمس غابت بالسما
يشعشع بوجها النور
ومن صوتها المسحور
تدرغل لها الحسون
ليغرد البلبل ، ويزقزق العصفور .
** لما التقيتا **
لما التقيتا بعد هالمشوار حسيت ما عد عالصبر فيني
قلتلها هالقلب مكوي بنار حاجي بنار الحب تكويني
قلبي احترق والعقل مني طار الفيني يا حلوة أنا مكفيني
غزلتلك خيوط الندي أشعار بلكي بوعود الحب توفيني
نسيتِ الوفا أيام كنا زغار قديش نقعد تحت هالتينة
أيام كنت تقطفي الأزهار ومن فلة ال بالدار تهديني
وجهك قمر من نور وجهك غار قمر السما يا درة جبيني
والتم أحلى من زهر جلنار زهَّر بعمري وعطَّر سنيني
وصوتك كنار وآه من صوت الكنار لو بس رنَّم يا تقبريني
والخصر متوشح بهالزنار يا ريت ع خصرك تلفيني
لتبرديني وتنطفي الأسرار لازم بنار الحب تطفيني
محتار وحياتك أنا محتار بغفوة عمر ما عاد تعرفيني
شو صار قوليلي بقى شو صار تاتنكري عهودي وتنسيني
ما زال ما ذكرتِ ولا تذكار ومينك إنت جيتي سألتيني
شو كار هالذكرى بقى شو كار لا تذكريها ولا تذكريني .
** هون الشمس **
هون الشمس بتطل من خلف الجبال
هون النبع نبع العطر شلال
هون الشجر والفي وصخور تدفق ميّ
هون القمر عم يغزل بمغزال
عند المسا نسمات .... بصدر السما نجمات
وإلها خيوط من الدهب سنسال
جوقة صبايا ع الكرم راحو تا يقطفو العنقود
ومن فوق من كتف الجبل لاحو بخدود أحلى خدود
يا ريتني ناطور هالعرزال
جوقة صبايا كلها رشقة ال بيشوفها بهالعمر ما بيشقى
تتنقل وتكرج كرج الحجال
هون البساطة والطهر والنحل ع شفاف الزهر
داب الحلا وع هالشفايف سال
وهونيك جنة حد هاك المصطبة بتمجد الخالق بقعدة مرتبة
بتسوى الدني وما بتنشرى بالمال
هون الربيع وهون غنينا يا مهاجرين وصوتكم فينا
هون البحر والشط والمينا لا تضيِّعوه العمربالترحال
هون البيوت مشَّرعة بوابا وإن زار ضيف بتضحك عتابا
وبو الزلف والأوف وعتابا تشمخ ويشمخ للسما الموال
وعنا نواعير الحلا بتدور لترش ع الأرض الندي والنور
وعند الصبح بيزقزق العصفور حامل بريش جوانحو الآمال
هون الشجر والفي وصخور تدفق مي هون القمر عم يغزل بمغزال
** وسألت عنك**
وسألت عنك وين كنت ِ وين بدي شي مرة تسألي عَّنا
منضل لو غبنا سنة وسنتين ونحنا بعدنا متل ما كنا
منشتاق نعرف سر هالعينين شو صار قلبي بلغزها معَّنى
ومحلا الشعر سارح ع هالكتفين شلال نور وسحر يفتّنا
وشفاف حمرة مجمَّرة وخدين في هالوجه يلي مجننا
قولي يا حلوة في لنا خلان اشتاقولنا وإلهن منتمنى
وبكرا إذا ما عاد كل شي كان وصوت البلابل ع الشج غنَّى
منرجع يا حلوة ع قمر نيسان نقلوا ع هالوقفات ذكِّرنا
منسأل الوردات بالبستان ال بعدا ما فتَّق بالهوى سنا
بتقول لولا الحب للإنسان ما في قلب فرفح ولا تهنَّى
الحب خفقة عاطفة بإيمان وقلوب ترسم بالسحر فنَّا
قومي يا حلوة ولا تقولي البين نحنا ع هالفرقة منستنى
منضل لو غبنا سنة وسنتين نحنا لكم وانتو القلب منا .
**أمي يا أمي**
قولي القلوب ال بالهوى شبُّو بعدن يا أمي متل ما تربُّو
حبني وقلي يا أغلى حب وبعبد يا أمي بلهوى ربُّو
حبني وقلي يا أغلى الكل
إنتِ الشمس للحب وانتِ الظل
ودخيل الله اللي خلق هالفل
تنعيش ع ذكرى الهوى بحبو
أمي يا أمي من زغر حبيت وع غير حبو يوم ما تربيت
ومرة التقينا ودق باب البيت وأختو تنادي وتنده تخبُّو
وقلي تعي بقلبي وفتح قلبو
وبقيت يا أمي وما تخبيت
هيك البيحبو ما بيتخبو.
**فرحة الشاعر **
فرشنا الدرب بقرنفل ومنتور تا تشرفو يا مرحبا فيكم
بعرس الهنا زقزق يهالعصفور وقلن أنا حامل غنانيكم
وجايب معي من جنينة الشحرور أحلى قصايد غزل اهديكم
صارت عناقيد الحلا بلور ودابو العناقيد بدواليكم
كانت على غصون المحبة زهور وعقدت مع الفرحة أمانيكم
معنا الكرم والناي والناطور ونسمات عطرا من روابيكم
انشاالله المحبة دوم تبقى سور بالورد ، وتسيِّج حواليكم
ويا رب تبقى دروبكم بالنور شموع الفرح تضوي بلياليكم
انتو بنيتو للسعادة قصور ربي وإله العرش يحميكم
واليوم أحلى جوقتين طيور جايي لعرسان المحبة تزور
وتقول يا عرسان يا حلوين ما في لزوم اليوم وصيكم
عيشوا بقلب صافي قلب مسرور والحب صوتو عم يناديكم
تيضل موسم للغزل مغمور وزورق فرح يرسي بشواطيكم
أحلى التهاني بزفها الليلة وبقول من قلبي ألف مبروك
بدعي لرب السما يهنيكم .
** شو ذكي **
ردِّت شعرها وراسها عليِّ تكي
وصارت تبوح بنار قلبا وتشتكي
وغزلت شعري من عيونا وحبها
همست بحبك داب ع شفافي الحكي
قلتلها يا حلوتي إنت ِ إلي
وقلبي أنا وحية عينيك ِ لك ِ
كاس الغزل إلا ع ثغرك ما حلي
ولغز العيون السود دوبني بك ِ
بكرا إذا ما العمر سافر وانقضى
منبكي ع هالأيام وشو نفع البكي
ردَّت شعرها والعيون مغمَّضة
وراسا ع صدري فوق قلبي مرتكي
قبلتها ع شفافها وما تركتها
إلا وعيونا مفتحَّة وصوتا يقول :
تقبر عيوني يا حبيبي شو ذكي .