** كلمة البدء**
قال جبران خليل جبران:
(( إن لكل لغة من لغات الغرب لهجات عامية،ولتلك
اللهجات مظاهر أدبية وفنية لا تخلو من الجميل المرغوب
والجديد المبتكر،بل في أوروبا وأميركا طائفة من الشعراء الموهوبين
الذين تمكنوا من التوفيق بين العامي والفصيح
في قصائدهم وموشحاتهم ،فجاءت بليغة ومؤثرة، وعندي
أنَّ في الموال والزجل والعتابا والمعَّنى من الكنايات المستجدة،
والاستعارات المستملحة، والتعابيرالرشيقة المستنبطة ما لو
وضعناه بجانب تلك القصائد المنظومة بلغة فصيحة ،والتي
تملأ جرائدنا ومجلاتنا ، لبانت كباقة من الرياحين بقرب
رابية من الحطب ، أو كسرب من الصبايا الراقصات
المترنمات قبالة مجموعة من الجثث المحَّنطة.)).
** أول المشوار**
هناك كثيرون نفوا أن يكون هناك أي فرق بين الزجل
والشعر المحكي ، أما شعراء اللهجة المحكية ،فيعتبرون
شعرهم غير زجلي ، والشاعر اللبناني أسعد سعيد اتفق
معهم في ذلك من أن الشعر لعبة خيال،وليس لعبة منطق ،
بينما الشاعر المنبري يحتاج خلال حواراته إلى استعمال
الكثير من المنطق ، وتلعب ثقافة الشعر المنبري دوراً
في الصياغة الشعرية المنبرية ،ولكن الشعر يرتكز على
الحجة أولاً وأخيراً، بينما من جهة الشكل يعتمد الشاعر
المحكي على شعر التفعيلة لا على أوزان الشعر المنبري
المحددة، وكل شعراء اللهجة المحكية هم فئة من المثقفين
الذين يتعاملون مع الشعر كشعر،وهذه فروقات مهمة
في الواقع ، ولكن يبقى الفرق الحقيقي هو الذي يتأتى من
الموهبة، ومن المستوى الثقافي ، وطريقة التعامل مع
الكلمة الشعرية ، فللشعر تجاربه الخاصة في الصياغة،
وفي الشكل البنيوي لكلماته وعباراته ، وهي تتطور
باستمرار فلا يصل الشعرإلى نهاية أبداً.
والزجل على صلة وثيقة بالشعب، ويحمل همومه اليومية،
فالحوارات المنبرية لا تخلو من التوجيه بقدر الترفيه،
ولا تخلو من النقد السياسي والاجتماعي، ومما قاله الشاعر
أسعد سعيد : إن أكثر نتاجي المكتوب هو مطالب يومية
تتعلق بالعامل والفلاح ، والمتشرد والطالب، وشكوى الفنان
ووضع المرأة ، فالشاعر الذي لا يتمكن من استيعاب عصره
والتعبير عنه يكون شاهد زور.
**مشوار الحلا**
مفيد نبزو
يا ملوَّعة طيري مع الأحلام ورفرفي ع جنينتي هدِّي
يا ملوعة طيري ، شو بعدك زغيرة
طيري سوى لنطيرأنت وأنا بكير
وخلي يقولوا الناس
زغلولة الأحلام صارت كبيرة
وتعوَّدت ع الحب والغيرة.
أنت وأنا يا حلوتي
صرنا على شفاف الدني سيرة.
مشوارنا بين الحبق مشوار ومعنا كتاب الحب لومعنى
وقفنا تهامسنا سوى وشو صار صار القمربالليل يسمعنا
يا ما تناغشنا مع الأسرار ويا ما بنار الهوى تلوعنا
وشو عاد بدنا من الدني أخبار ما دام صفت هالدني معنا.
رفي وطيري بين هالأطيار رشي العطر بجنينة الأزهار
من طلتك طل الندي بكير ومن بسمتك كل الدني مشوار
وغيرك حلا بهالعمرمابدي.
نامي على ريش النعام ونامي على زندي
البيحبّ متلي حب مابينلام وشو بتطلبي من لهفتك عندي.
وغيرك حلا بهالعمر مابدي.
** أسطورة**
كلما بلمح شي عصفور عم بيغازل عصفورة
بجنينة ورد و منتور ع البركة والنافورة
وكم فراشة عم بتدور بجناحاتا مسحورة
تتعلَّق بخيوط النور وتلوِّن أحلى صورة
بكتب للعشاق سطور وبعمل منها أسطورة
** بعد كسرة ميجنا **
محلا العتابا بعد كسرة ميجنا:
*
يلي هموم العمر بإيدك ما حلي
شوف العسل إلا برحيقك ما حلي
قبلك حياتي متل صحرا ماحلة
واليوم عرَّش ياسمين قلوبنا.
*
مركب هوانا بالبحر عَّلا وعام
رندح معو صوت الفرح والخيرعام
يا رب بارك بالمحبة كل عام
وكل عام وأنتو بخير يا أحبابنا.
*
ندهتلك أنا من الرب برجي
ياحلوة يكون برجك متل برجي
تعمِّر لك ع جنح الغيم برجي
وخلي القمر حارس ع البواب.
*
بعمر الزنبقة الحلوة عمرها
سقتني كاس المحبة عمرها
وكلما بقول : المحبة عمرها
بحس العمر شارف ع الغياب.
*
بليلة نقرت شباكك وفقتِ
سألتك إذا بتروحي وفقتِ
وكنت القمر بالعتمة وفقتِ
بجمالك ع القمر عند الغياب.
*
جبيلي الكاس من دمعي لعبي
هوى العشاق بشعرك لعب بي
يا ريتك تسمحي ضمك لعبي
وبعدها موت في عز الشباب.
** ذكرى وقصيدة **
يا ملاك الروح ربي ماخلق..
متلك صبية خدودها بلون الشفق..
لما خيالك شرد من صوبي ومرق..
فتَّح بقلبي الورد واخضَّر الورق..
ما عرفت شو اللي اختفى مني وانسرق
يمكن سرقتيني وتركتِ شتلتين:
ذكرى ، وقصيدة حب ع دروب الحبق.
** ضِّلي معي**
ضِّلي معي..
ضِّلي معي..
بعزف غناني للهوى..
بعزف رصد بعزف نوى..
وبقلك عيوني اسمعي.
بفرش من الدالي ورق..
بزرع الزنبق والحبق..
ع درب بيتك كلما رح تطلعي.
لحَّتى لما بتنزلي ، وبتخجلي،
وتتلبكي، ويصير بدك توقعي،
لحَّتى ما تتجروحي وتتوجعي
يضمك الزنبق والحبق،
ويهب قلبي بلا وعي:
لا تفزعي
ضِّلي معي..
ضِّلي معي..
ضِّلي معي..
**ضيعتنا**
**مفيد نبزو **
لمن نقور طير الحب
ع شبابيك الضيعة الحلوة
قلنا هالضيعة ضيعتنا
وهي رسمتها،
وهي بسمتها،
وبعدا شبابيكا المفتوحة
ع الشمس بتشلح نظرتها،
ولمن فاح الزنبق عطرو من جدولة
هاك الحلوة ،
قلنا هالحلوة حلوتنا،
وهالجدولة المرمية ع كتاف الخضرة
جدولتها ،
ولمن غنَّى الليل غناني
ع الضيعة الحلوة المسحورة بمحبتها
قلنا هالضيعة ضيعتنا ،
وهالغنية غنيتها:
حس السرندح يردح
وما ننام الليلِ .
حتى الخيَّالة ترمح
على ظهورالخيل ِ
وابن الأصايل يدبح
وتصبوا القهوة بهيل ِ
حس السرندح يردح
وماننام الليل.
وهيهات يا بوالزلف
عيني يا موليا
لفرش دروبك حبق
وورود جورية
يا شيرمحلا الورد ع كتاف عاصينا
يا ما بعز البرد ع صخورك مشينا
عنا البيادر غمر بالخير تكفينا
وأحلى ليالي العمر غزلان عالميَّة.
ولمن طلت هاك الحلوة والغوازي بحطاطتها،
والزي تحلا بقبعتها ودراعتها، وصفيتها،
وخيوط الفضة بلمعتها، قلنا هالحلوة حلوتنا
من ميتها ومن نبعتها، ومن عاصيها وطاحونتها، من الوسيطة وباشيتها،
ونسمة الملولح نسمتها، ومن هالأرض
اللي بتعانق في خضرتها الشمس ال خلقت
من خلقتها طلت تتباهى بطلتها،
ولمن راحت هاك الحلوة ومرة ع راسا
الخلقين، ومرة ع كتافا جرتها ، قلنا
هالحلوة من عنا ،وهي ضيعتنا،
ولما فتحنا هالصندوق اللي مرصَّع
كلو بالعاج، وكانت بقلبو حكايتها،
قلنا الحكاية حكايتنا ، وهي ضيعتنا،
والله اللي مبارك ضيعتنا،
ومع زاهية أم فريد ماأحلى باعوت العيد
بتزلغط وبتغني وبتخلي الأفراح تزيد
وأطيب من مسك وعنبر الشاعر مروان العنبر
جينا نكمل مشوارو ونحنا بتاريخو منكبر
لما يرندح أشعارو يرِّقص خشبات المنبر
وشيل محرداوية شيل ويا محلا السهرة بهالليل
ما في أحلى من السهرات لما بيصدح بو سهيل
(درب الغزلان من عنا سيري ع الدرب السالك
يا ريمة الهاربة منا شو ردك عنا ومالك
غاروا الجيران وعلموك تجافينا
مروا الغزلان و ما حنوا ع مراعينا
أحلى الأيام يوم تعودي تلاقينا
تصفى الأنغام ونردد أغانينا
والورد زرار يضحك لو مر خيالك))
وما في أحلى من ضيعتنا ، والله اللي مبارك ضيعتنا.
* مفيد نبزو * محردة *
** عاشق الضيعة**
يا جايي من الغربة تزور الكرم و عرزال الناطور
هون الطبيعة شلال وعصفورة تغازل عصفور
بين الجوزة والنبعة شو غنى بصوتو الشحرور
ومَيّة أصفى من الدمعة من نبع الضيعة المسحور
عم تضوي متل الشمعة وريحتها ريحة بخور
قال الشاعر فيها قال من عينيها فاض النور
و يا محلا صوت الموَّال والدبكة تعقد وتدور
والسهرة ع سطوح الدار حكايات من الماضي سطور
ويا محلا جدي الختيار وستي تخبز ع التنور
نحنا كبار خلقنا كبار ورح نبقى بالعالي نسور