the mayde / suffred payne & passyon vnd^r Ponce Pylate. Crucefyed / deed / & buryed / he lyghted downe to helles. The .iij. daye he arose frõ deth to lyue. He flyed vp in to heuens. He sytteth at the ryght syde of god the fad^r almyghty From thens he is to come to deme both quycke & deed. I trowe in y^e holy goost / holy chirche vnyuersall / comunynge of sayntes / forgyuenes of synnes ayen rysynge of flesshe / & euerlastynge lyf. Amen. Hope is truste by the mercy of god to be saued. And it standeth in the grace of our lorde & our good werkes. Charyte is the ende & the perfeccion of all the cõmaûdementes of god / and it standeth in the loue of god aboue all thynges / & thy neyghbour as thy self

These ben the seuen vertues ayenst the seuen vyces.

Mekenes ayenst pryde.

As in boostynge / despysynge / scornynge / hyghe herte / fayrnes / connynge / strengthe / vertue / pryde of kynne / vayne glory / dispyte of other / ypocresy.

Pacyence ayenst Wrathe.

As fyghtynge / chydynge / hurtyng / betyng / warryeng / cursynge / grutchynge / desyre of vengeaûce cruelnes &c.

Charyte ayenst Enuye.

As gladde of an other euyll fare / & to be heuy & sory of theyr welfare / bacbytynge / sowynge of dyscorde / scornynge / and suche other.

Largenes ayenst Couetyse & Auaryce.

In wynnynge / in byenge / in sellynge / in metyⁿge / in waynge / gyle / trechery / sacrylege / symony / vsury / theeft / receyuyⁿge of stolen goodes / wronge withholdynge of ony dute to the the chirche &c.

Good occupacyon ayenst Slouth.

As ydelnes / delyte in slepe / neclygent to cõne y^e lawes of god / vnlusty to y^e seruyce of god / myspendynge of tyme / dyspayre / wanhope & suche other.

Abstynence ayenst Glotony.

As in moche etynge & drynkynge / brekynge of faste / desyrynge of delycate metes & drynkes &c. These ben the fyue goostly wyttes. Mynde / reason / wyll / ymagynacyon / vnderstandynge. These ben the fyue bodely wyttes. Herynge seynge / smellynge / tastynge / and touchynge.

Chastyte ayenst Lechery.

As in thought / wyll / werke / in syght / in felyng in p^rouokyng / or synne ayenst kynde w^t many other The .vij. goostly dedes of mercy. Teche / coûsel chastyte / comforte / forgyue / suffre / & praye for thy enemyes. The .vij. bodely dedes of mercy. Fede the hongry / gyue drynke to the thursty / clothe the naked / herborowe the herbourles / comforte the seke / vysyte prysoners / burye the deed.

These folowynge ben the .vij. gyftes of the holy goost / that euery man sholde desyre to haue and kepe. Wysdome / counsell / knowynge / pyte / vnderstandynge / strength / and drede of god.

These folowynge be the .iiij. cardynall vertues Temperaûce. Is a meane betwix to moche & to lytell / & it standeth in takynge suffycyently y^t nedeth & in refusyng y^t is to moche or to lytel vtterly

Ryghtwysnes / is a paynge of a dute to eche thyⁿge y^t it duly longeth vnto / as to god praysyng & thãkyng / to thy neyghbour loue & charyte / & to thyself besynes to fulfyl goddes wyl & his cõmaûdement^es

Prudence or Wysdome. Is a vertue y^t departeth good from euyll / & it standeth in chesynge good & refusynge euyll.

Strength maketh ony myghty and hardy to do grete thynges for the loue of god & in suffrynge pacyently aduersyte / and mekely takynge prosperyte.

These ben the .vij. sacrementes of holy cherche Baptysme / wedloke / the sacrament of y^e awter / cõfirmacõn / ordre / penaûce / & the last enoyntynge. Here folowen the .x. cõmaûdement^es