Conquestor, Rufus, prior Henricus, Stephanúsque,

Alter & Henricus, Leonino corde Richardus,

Rex & Ioannes, Henricus tertius inde:

Eduardus primus, Gnatúsque, Nepósque sequuntur:

His infœlicem Richardum iunge secundum:

Henricus quartus soboles Gandaui Ioannis,

Præcedit Gnato quinto, sextóque Nepoti:

Eduardus quartus, quintus, homicida Richardus,

Septimi & Henricus octauus clara propago:

Eduardus sextus, regina Maria, Philippus:

Elisabeth longos regnet victura per annos,

Seráque promisso fœlix potiatur olympo.

Gramine, fluminibus, grege, principe, fruge, metallis,

Lacte, feris, armis, vrbibus, arte, foris,

Quæ viget ac floret generosa Britannia, quæque,

Obruta puluereo squalluit ante situ:

Exerit ecce caput, genuinum nacta nitorem,

Et rutilum emittit cum grauitate iubar.

Et quod blæsa hominum mutilarat tempore lingua,

Illud habet rectum pumice tersa nouo.

Loydus in hac pridem gnauus prolusit arena,

Lelandus, Prisius, Stous, Holinshedius,

Lambardus, Morus, Camdenus, Thinnius, Hallus,

Vocalis, Grafton, Foxius, Harrisonus,

Hardingus, Gildas, Staniherstus, Beda, Neuillus,

Doctáque Flemingi lima poliuit opus:

Nec te cane senex, magne ô Parkere, silebo,

Cui decus attulerat pontificalis apex.

Omnibus his meritò est laus debita & optima merces,

Quòd patriæ accendant lumina clara suæ.

Longa dies opus hoc peperit, longæua senectus,

Et libri authores perbeet, atque librum.