Page 1
شاعر
( 1 )
كان مقصوص الأظافر..
لينٍ قاسي وطاهر.
أبيض النّيه بشوش
لا ينوش ولا يحوش
وإن قفل باب الرموش
ينام .. خدران المشاعر!.
كان يجتاح الزمن .. بالعنفوان
ويطرد الهم ويغني.
بايعٍ دنياه، مجنون الحنان..
وسط الأحزان مْتهّني؟!
إن شرى خبزٍ عطاه
وإن تِعب ما قال: آه
بهجة الدنيا غطاه..
وفرشته .. حِلْم وتمني!
كان مِنّي..
أو أنا اللي صرت منّه؟!
كِنّه اللي تحت هذا الثوب كِنّه!
Page 2
يا كثر ما أحن له وأذود عنّه!
كان غير الناس..
فايض الإحساس
لا مشى وسط اليباس، يصير جنة!
كان ما منّه، فريد بكل شي..
بطيبته، وبعشرته، وبضحك سِنّه!
كان صياد القلوب..
وكان قنّاص الضفاير.
عن ذنوبه ما يتوب..
ولا يملْ من (السكاكر)
وآخر آخر ما يفكر فيه..باكر!
( 2 )
كان يطفيه الهوى
ويشب.. من حبٍ جديد..!
كان يشعل في سراديب النوى..
موعد، ومليون عيد!
وبين تنهيدة وجيد..
بين يمكن أو أكيد..
يوزن أوتار الوريد.. ويعزف النبض بمزاجه.
كان ما له في هداة البال حاجة.
يا كِثِر ما لمّ حوله من فَراش
ويا كثر ما احرق سراجه!
Page 3
ويا كثر ما أعطى السعادة من طَناش..
ويا كِثر ما أطلق حْجاجه!
من بغى يلقاه، يلقاه الغباش..
ما حدٍ يلحق عَجاجه!
المعي ٍفي علوم الحب..
وأستاذٍ قدير.
كل ما حلّق يِطُبْ..
وكل ما وَقّع يطير!
كان طير..
صافق الجنحان طاير..
كل ما لاح الهجير..
ونادِته شمسٍ .. يهاجر!.
( 3 )
اسألوني عنْه أكثر..
اسألوني وأتذَكر.
المحيط، اللي بقى فيه الملاح..
وعذبه الصافي تبخّر!
الخضار، اللي على جوع الرياح ..
جاد، لكن ما تكسّر!
الوضوح، اللي سرق لون الصباح ..
Page 4
وانسجن في وسط دفتر!
اقروا سْطور الحياة اللي كتبها..
ما كتب شيءٍ ولكنّه .. شطبها!
فانية تضحك عليه..
وغانية يلعب عليها!
يشتهيها وتشتهيه..
ولا تبيه ولا يبيها!
غايةٍ له ما طلبها.
غلطةٍ له ما ارتكبها.
حظ، ولكنّه مقدر
ومن يعيش يشوف أكثر.
دنيته مثل الكتاب
قصة وأَوّل وآخِر
من قراها..
صَارت بعينه سراب..
وصار شاعر؟!
عمان/ فبراير 1999
Page 5
أشعلتني
(1)
أشْعَلتني..
وأشْعَلت باقي عتَبها..
وقالت بتحْنان:
يا ألم كل الخطايا..
يا حبيبي..
ما كفاك أحزان؟!
النوارس هاجرت بأرزاقها..
وصُبحَك..
على شط المسَا مسّى
ومسَاك بلا جمر .. بردان!
مالك ومال الهيمنة
والظلم والحرمان..؟!
مالك ومال الأمكنة،
والقِسط والميزان..؟!
ومالك ومال المستحيل،
وكذبة الإمكان..؟
ما أنتَ مغيّر في الوجود..
Page 6
لا مسلمين ولا يهود..
ولا لك غنى عني،
ولا عن ظليّ الممدود.!
أدري بك أدري بك أنا..
وأحس بك وقت العنا
وأصدّقك أحيان!
يا مُوجعي:
ويا شاغلٍ حالي-
وبالي ومدمعي.
لا يشغلوك الناس
خل الناس، وإتهنّى معي..!
وما قدّر الله كان.
( 2 )
طفلة حياتي
بنت روحي، جنتي..
لاتنفري.
لا غامت فجاج الوجود بخاطري ولا تمطري!
أنا حنيت الراس..
وجيت، أستسمح الإحساس.
في هذا الحلا المياس، والطبع البري.
وأحلف على إني بري..
Page 7
من كل تلفيقه..!
وإني على فطرة أبو كل الخليقة..
في الحقيقة.. شاعري!
وإنك دواي ومشتهاي
وإنك هواي "المفتري"..!
ليه الَوَجَل!!
ما بَهْ لـِزوم لها لوجل..؟!
يا أم العيون اللي تبعثر في مداها دفتري!
ومهما حصل أو ما حصل..
لا تشنقي أيامنا الحلوة بحبل من الزعل..
ولا تكشري!!
وأبا وعدك .. وأفعل وأقول..
إني لاجيك من الغياب..
سحاب وأسراب وخيول.!
أنا ملول..
فعلا أنا واحد ملول .. (وفنقري)!!
وإن مَلْ قلبي من الوجع
قولي لعذالك وجع يوجع وجعكم، وأزمري.!!
وقولي لهم نبضي رجع..
قولي لهم بعضي رجع..
قولي لهم صالح رجع، واستبشري..!!
ولي شرط واحد.. بس واحد..
صبريني واصبري!
عمان / كانون الأول 2001
Page 8
أحزان
( 1 )
البلد..
يا كثر ما فيها من أحزان..!
والسهر .. سلوة حيارى
والعذاب إنسان.
إشرقي من وحشة العتمة وكوني
صبح يرتاح بعيوني
وشمس ريانة حنان.
علميني أبجديات الهروب من الغروب
ولحظة الفقدان..!
آه .. يا صُعُب هذا الزمان.
وين أولّي؟!
ما بقى لي غير وجهك..
جيت ألوذ بنور وجهك
من عبوس أهل الزمان !
جيت أقول -
إني تعبت من السفر
بين الصور..
وإني ضِجرت من الضَجّر
ومعانق الجدران!!
Page 9
وجيت أقول-
إني هزمني البرْد
وإن الوجْد كايد
والأمل خّوان..!
وجيت أقدم لك قصايد ورْد..
لكن .. نصفها حزنه يفوح
ونصفها ذبلان..!!
وجيت أبا أنسى
وصدقيني ما بقى فيني جَلَد.
ومحدٍ من الهمّ خالي..
وكل خالي..
ما خلا من هالنكد
والبلد .. يا كثر ما فيها من أحزان.
( 2 )
قصّري صوت المسجل
سكتيه اللي قضى عُمره (يدجّل).
ضحكتك، ياني شغوف لجلجلتها-
جلجليها ..
واتركي الدنيا تجلجل
واعزمي الفرحة
وخليها تعجّل بالوصول .
الأغاني..
كِذبة إنسانٍ يعاني
وشي ثاني
لا تظنيها مواني..
ولا تِعدّيها ولا رُبع الحلول!
والطرب..
إنتي طرب كلّك
دخيلك موّجي ظلك
وقولي كيف أفلّك ..
وإن جمعتك،
علميني وش أقول!؟ .
Page 10
تلمذيني ..
لعنة الأستاذ من حولي طفت ضوّي..
وتوّي..
بأول فصول التأمل والذهول!!
والخَطَاوِي في حَذَر تنسل بي وسط اندهاشي
والعقل مشلول!
يا دليل اللي غَدا مِنْه الدليل..
اقهري ها لمستحيل
وانفضي عن كاهلي حمل المسافة
ولا تخليني كذا.. مثل الذليل !!
وكان في قلبك حنان..
طالبك: لا تتركيني
في مهب الحزن وأوجاع الزمان.
اغسليني من غثا الأيام بشوَية وفا..
ودورّي لي
في ظروفك
عن مكان وعن أمان.
غَيـبّـيني
في مناخات المشاعر
في تضاريس الجسد.
لو دقايق تحسبيها،
لو ثواني بالعدد.
وبعدها ما أبي أحد غيرك
ولا غيرك أحبه للأبد.
والبلد..
يا كثر ما فيها من أحزان.
عمان/أغسطس 2000