despyte, thei hanged ower the steaple.[17] Thou shall revenge, O Lord, in thy appointed tyme! The caus that in so great a danger thair was so small a losse, nixt unto the mercyfull providence of God, was the suddane cuming of the Lord Ruthven; for evin as our men had gevin backis, he and his cumpany came to the head of the bray, and did not onlie stay the Frenche footemen, but also some of ours brack upoun thair horsemen, and so repulsed thame that thei did no farther hurte to oure footemen. In that rencontare was the Erle of Sudderland foirsaid schote in the arme, and was caryed back to Cowper. The Frenche took Kinghorne, whair they lay, and wasted the countrey about, alsweall Papistis as Protestantis; yea, even those that war confidderat with thame, suche as Seafield, Weames, Balmowto, Balwearry, and otheris,[18] ennemyes to God and traytouris to thair countrey. Of those (we say) thei spaired not the scheipe, the oxen, the kyne, and horse; and some say that thair wyffis and doughtaris gatt favouris of the Frenche soldiouris. And so did God recompense the Papistis in thair awin bosomes, for, besydis the defoulling of thair housses, as said is, tuo of thame resavit more damage then did all the gentilmen that professed the Evangell within Fyff, the Laird of Grange onlye excepted, whose [house[19]] of the Grange the Frenche owerthrew by gun pouder.

The Quene Regent, proude of this victorie, burst furth in hir blasphemous rayling, and said, "Whair is now Johne Knox his God? My God is now stronger than his, yea even in Fyff." Sche posted to hir freindis in France news[20] that thousandis of the heretickis war slaine, and the rest war fled; and thairfoir requyred, that some Nobleman of hir freindis wald cum and tak the glorie of that victorye. Upon that informatioun was the Martikkis, with tuo schippis, and sum Captanis and horse, directed to cum to Scotlande; but litill to thair awin advantage, as we sall after heare.

The Lordis of the Congregatioun, offended at the folisheness of the rascall multitude, called to thameselfis the men of warr, and remaned certane dayes at Cowper; unto whome repaired Johne Knox, and, in our greatest disperatioun, preached unto us a most comfortable sermon. His text was, "The danger in whiche the disciplis of Christ Jesus stude quhen thei wer in the mydest of the sea, and Jesus was upon the mountaine." His exhortatioun was, "That we sould not faint, but that we sould still row aganis these contrarius blastis, till that Jesus Christ sould come; for (said he,) I am as assuredlie persuaded that God sall delyver us frome the extreme trowbill, as that I am assured that this is the Evangell of Jesus Christ whiche I preche unto [you] this day. 'The fourth watche is nocht yet come;' abyde a lytill: the boit salbe saved, and Peter, whiche hes left the boit, sall not droune. I am assured, albeit I cannot assure[21] you, be reason of this present rage; God grant that ye may acknawlege his hand, after that your eyes hes seine his delyverance."

In that sermon he comforted manye. And yit he offended the Erle of Arrane; for, in his discourse upoun the manifald assaultis that the Churche of God had sustained, he brocht for exampille the multitude of strangeris that persewed Jehosaphat after that he had reformed religioun. He entreted the fear of the pepill, yea, and of the King himself att the first; but after, he affirmed, that Jehosaphat was stout, and to declair his courage in his God, he conforted his pepile and his souldiouris; he come fourth in the mydest of thame; he spak lovinglie unto thame. He keipit not himself (said he) inclosed in his chalmer, but frequented the multitude, and rejoised thame with his presence and godlie comforte. These, and the lyik sentences, took the said Erle to be spoken in reproache of him, because he keipit himself more close and solitary then many men wald half wisshed.

After these thingis, determinatioun was tacken that the Erle of Arrane, and Lord James, with the men of warr, and sum company of horsemen, sould goe to Dyserte, and thair lye to wait upoun the Frenche, that they distroyed not the sea-cost, as thei intendit utterlie to have doun. The said Erle, and Lord James, did as thei war appointed, albeit thair company was very small; and yet thei did so valiantlie, that it passed all credabilitie:[22] for twentie and ane dayis thei lay in thair clothes; thair buttis never come of: thei had skarmissing almost everie day; yea, some dayis, from morne to evin.[23] The Frenche war foure thousand souldiouris,[24] besyde thair favoreris and factioun of the countrey. The Lordis war never togidder fyve hundreth horsmen, with a hundreth souldiouris; and yitt thai held the Frenche so busye, that for everie horse thai slew to the Congregatioun, thai lost foure Frenche souldiouris.

Willyeaume Kirkaldie of Grange, the day efter that his housse was cassein doun, send in his defiance to Monsieur D'Osell, and unto the rest, declaring, that to that hour had he used the Frenche favourablie: He had saved thair lyves, when that he mycht have suffered thair throttis to have been cuttit; bot seing thai haid usit him with that rigor, let thame not luik for that favour in tymes to cum. And unto Monsieur D'Osell he said, "He knew that he wald not gett him in the skirmissing, becauis he knew he was bot a cowart; bot it mycht be that he sould quyte him a commoun ather in Scotland, or ellis in France." The said Willyeaume Kirkaldie, and the Maister off Lyndsay, eschaped mony dangeris. The Maister had his hors slaine under him: the said Willyeaume was almost betrayed in his hous at Hawyairdis.[25] But yet thei never seased, bot nycht and day thai waitted upon the Frenche. Thai laid thameselves in a secreit place, with sum gentilmen befoir the day, to await upoun the Frenche, quho usit commonlie to isch in companyis, to seik thair pray; and so cam fourth ane Capitane Battu,