أم أحمد المصرية شاعرة (عَامّيه)

يا عامّيه يا عامّيه
يا سمكه طالعه م الميّه
بتتعـاجـب يا بُلطـيّه
يا زرعايه أخضرانيّه
يا وردايه مّنديّه
وكلمة حب ورديّه
يا حلوه يا اسمرتنيّه
يا عامّيــــه
يا ضحكايه وهمسايه
يا قُلّايه وضلّايه
وشمْسايه ووردايه
يا لهجايه صَعِيديه
وفلاحي ونوبيّه
يا لهجه حلوه مصرية
قصــيده ولّا أغنيــه
يا عامّيــــه
يا صابحه زى لقمة عيش
وطاهره زى حُب الأم
وأتنفِّس هواكى أعيش
واتمنى أضمك ضم
وانا عشقاكى من يوم
واقولك تنطقى همومى
وانا ف الأصل مصريه
كلامي كله عامّيه
يا عامّيــــه
وأنا با اتباهى بأصولى
ما فيش واحد يقول قولى
ولا واحد يطول طولى
يزول الكون وما تزولى
يا عامّيــــه
أنا أعرف أقول القاف
واشيل القافيه بالمقطاف
واجرجر في حروف الجر
لكنى .. با اخاف م القرْ !!
واعرف أجيب خبر كان
وانصب مبتدأ إنَ
وأقول ف كلامى لعلَ
وما زال .. ولكنَ
وأتشدّق .. وأتنمّق .. وأتحذلق .. وأتمزلق