بْعلبَك

عيوني بلا مَرْبا بَلا تهذيب
عالكذب كذّابين
وكِذبن متل قلبا
من زغرتُن بيمرجحو الحلوين
يا موقَّفي عا مرفأُن زورق
مَطرح مــــــ غص الضو وتشردق
تْوقّي تْوقّي زورقِك يغرق
عا مرفأي الموجات
عطشانين
لا تزعّلي لا تنزلي صنّين
العلاّ، تَمَا خلاّ
بينو وبين اللَّه
وبين السما مَمْرق
لا تمرقي، لا تمرقي ببالي
عيوني مَــــــ بقدر طفّيا
شْياطين شو بيهدّيا
إن راح صدرِك يشهق قبالي
عْيوني عيوني قوبة مْجانين
لا رَبْ عندُن لا سما ولا دين
ومن زِغرتُن زعْران قدّيسين
وقُولي لها لمريول
يبقى معي رَسمي
وما يندَه بأسمي
كل ما مَرق نسمي
إنتبهي الحرير يطيرْ ويعلّي
وان طار هُوّي مُش أنا
المسؤول
عن قلعة بعلبك،
عن عواميد بتصلّي
عن «روميه»
عن مرمرا المصقول
عن قناطر راكعه وبتقول
يا دلّي
في «غول» قاعد تحت
هالمريول
عن الصخر الأردنيْ
عن شمعتين من معبد
«الأكروبول»
عن هالدني
وعن آخر حدود الدني